საიტქ გინილუ ათე მისამართიშა  www.peuli.blogspot.com უჯგუშ ტექნიკურ პიჯალაშ გეშა (ათაშ რე წკონდა მარგალურით). თაქ დოსქიდუ ჯვეშ ვერსია.

საიტი  გადავიდა ამ მისამართზე   www.peuli.blogspot.com უკეთესუ ტექნიკური პირობების გამო. აქ დარჩება ძველი ვერსია რომელიც  განახლდება როგორც ახალი საიტის დუბლიკატი.

კოჩიშ რინა მუთუნ ვარე,

გივობირა გიტარას,

გურს მაჭუ დო მეწამალე,

ღვინიშ შუმას მივარანს.

მა იშენით გივობი დო,

შური მითინქ ვაქალას,

წორო ოკო დიბშუმათ,

მა დო ჩქიმი ლახალაქ.

ტობავარჩხილჲ  წკონდა,

პეულეფიშ დოლო,

მელიშია მონდა,

ანდა ჭუა, კოლო.

 

ცაშკიბულიშ კონკას

თუთა ელნაფალა,

ოსარკალაია,

თილი ჭითაგვალა.

 

მერეკელა ტობა,

ანდა მონკა შინა,

უთოლონჭეშ  კობა,

ნაკილოთა რინა.

1.მელიშია-მოცვი

2.ანდა-რამდენიმე

3.კობა-ნდომა

4.ცაშკიბული და ჭითაგვალა-მთები სამეგრელოში

სქან გინაწონს, გიბჭყოლიდე,

ლუბა ზღვაშფერ, ჸვაჩეია,

სქან სისქვამექ აკომქარგუ

შურიშ ბადე, ტყვარჩელია. 

გოღაწონერ მუნაფა ცას

ამდღა აკოფაჩენია,

თირს ქუდუჭყაფგ  წირადუა

ზენიშ მინდორს, ტყვარჩელია.

  

ჩქიმ დოხორეს ხავერდიშ ნოხ

მუჟამ ოკო დარჩენია,

არძო ჭუა ათე ზოთონჷს

ქავოტუათ, ტყვარჩელია.

  

ცოდა იპიქჷ, სქან ოროფაშ

უმენურს წყარ ვაბჩენია,

აფუნ, აფუნ ქუმომჭიშე

შურ-წყუნაფილს, ტყვარჩელია.

1. ტყვარჩელია-ყოჩივარდა

2.დოხორე-სასახლე

ორკინუნ დო ვამორჩილგ

დამორჩილიშჷ ბორიას,

მუთუნ ვახვარჷ, ქავოჩინ, –

ჭყონიშ ეიფორიას.

 

წანაქ ბრელქ მუმოკორდჷ,

შურ ორთ ერია-მორიას,

ჭყონშა, ქომწით, მუ ოკოდჷ

შურდინაფილ ბორიას!

ზღვაშ-ფერ ცაშგურს ლურმორებულ

თუთა თოლეფს უმანუანს,

ტყას ხოლო ლურ გოტახუნ დო

სერს ჩქიმწკჷმა ოთანუანს.  

დოშურდუდა, თუთა ლებო

ჩე მუნაფას ქაგთიფინანს,

ლანტით რულქ თოლგ გაქთუუღჷდა

მარწკინაია გაგმოთირანს.

ტყაშმაფა ღალს ამბეს არჩენსჷ,

მუსუთ გვალა მაჩინანსჷნ,

ცხაცხუშ წვანდშე ჩიტ სერს ორკინ,

შარა ვარე, ვარჯგინასჷნ?!

განჩი მუთუნ ვაგნიჩინე

ოკალმახეშ სიორიშა, –

ოჭაკეშ ტყაშ არიკ მოუღ

ემხვარეფიშ ნოხორიშა 

ოქუმ-წყარ ლურს ბორდიშანს დო

სათანჯოს ჟი მურიცხ ჭვიტანს,

ბებიშ ნაჭვა ჭვიშთარჯგუა

თუთა ცაშ ვას  მიკოცვითანს!

1.ტყაშმაფა-მეგრული მითოლოგიის პერსონაჟი

2.სათანჯო-სოფელი სამურზაყანოში

3.ოქუმწყარი-მდინარე სამურზაყანოში

ზენიშ დიხას უფერუანქ, მიჩქუ,

ოქუმიშ ცა დუდშა გისხუნ, ჯიმა,

ჯვეშობური ქიქანქალნო სიორ

ცხაცხუშ ჯინჯის, სუკის, – ეკალწკჷმა?

დიდა – დიხას შურ ქუნთხანსო ხვითოშ,

ქოშოლუნსო ცუნდ ლაიტიშ სუას,

ქახვარუნო შურო მუთუნს იმენდ,

ამარ, გოღა გინოღალირ ჭუას?

ბჟაშ ილულას ქისარკუნო სქვამას,

ზღვაშ ზოლიშ ჟი ცაშ ფონ ძოწიშ ფერით?

ურჩქილექინ, წყარიშ ხუმა, ალბათ,

ოშნერ ფირქემს მუშკოოთანს სერით.

ანარაშ დუდს ქორწკინჷნსო ვარჩხილ,

ჩე მუნაფა ქიგნოჸუნსო გვალას?

ხვიჩალ თოლეფჲ გოუჯინი ალონს დო

გვალო შხვა დღა გოთანდუნშო მალას!

სი გიჩქ, ჯიმა თე ართ ტკოუ დიხას,

მუშ მადიდა ჸოროფა რე ტყობუნჷ,

დადიანიშ ბაღიშ ჩიტ დო ვარდა, 

ოქუმ-წყარიშ კალმახ ნეტე, ქოპუნ!

ილორიშ კარს სანთელს დობჭუნთ მალას

ილორიშ  ჯვარქ ქიკორინდა შურო,

ბირა-ბირათ გათანუანს სერეფს,

მაფშალია ანწით ჯვეშობურო.

1.ანარა-მთა სამურზაყანოში

შხვებქ დათირუ, მუ თირანსუ არდას,

ჯარგვალიას სერეფს ტახუნც ფართას,

ჸათე ტყა დო ჸათე დიხაშ ნარდას,

შეულებნო ჩელაია ვარდას?!

ოჭმარესუ ფსუალეფი არდუ,

მარა არდაშ ჯარგვალშა ვემნართუ,

მეფუნს ქიანა წყარიშორო მართუ,

არდა ირო მუშ ჯარგვალშა დართას.

შვერთიშ თოკის დოგიხორუნს არდას,

თოფურიშფერ ხოჯეფს ეკოხართანს,

ცხვინშა გუმუძ დამორჩილიშ ხანდა,

არდა ირო მუშ ჯარგვალსუ დართას.

ტყას ორტყაფუთ გეკოკირუნს ხინკის,

ტყათ ოდეფი ქიგიბანჭუ მინქი,

მარაშ ოღალს თირუნს არდაშ ყვინგი,

არდაქ ირო მუშ ჯარგვალსუ დართას.

ყებურიშ დუც გეკოჭოფუნს ნორცხვას,

არდაშ ზესქვიშ მებირაფა ორძღანს,

არდაშ გური ჩილამურქუ გორჩხას,

არდაქ ირო მუშ ჯარგვალსუ დართას.

ქარღადისუ ქიმიოკირანს თუთუნს,

ნირსეფიშე ვეიშაჸუნე მუთუნს,

არდას გურსუ ზოთონჯეფი უთუნს,

არდაქ ირო მუშ ჯარგვალსუ დართას.

ვადუდვალუ მითინს არდაშ განთხი,

ჯიმა გაფუ გიკინდუ თუ დანთხი,

არდა, წიე, წკვარამეფი განთხი,

გიოსქირუ ოსურსქუა ქარდას!

უჸორქუ და ვათქუალუ მორო,

ორთუმალშა მეჩანს სქანი ორო,

არდა, ხვალე თიშო ვარექ  ბორო,

ჯარგვალიაშ კარ გოუნჯი ფართას!

ჩქიმ ჸოროფა, ჩქიმ გურიში ჭუა,
სოვრე იმნტა, სოვრეშე იმნჭუა,
ქიფრჩინუქ დო იშენ ვორექ ჩქიჩქი,
გურს ბონდღუნსუ სქან თოლეფიშ ჩხვიჩხვი.
ბაღანობა გუმაშინე ჩქინი,
მუსხი სერ დო ჭუას გივორჯგინი.
ჩქიმ შარა რე ჩეშმანი დო თინუ,
სქან თოლეფშა დღასუ ვამანტინუ,
მუ დაჩხირ რდუ დორზამილ თე გურსუ,
ოხოხოი, მუსხი მუთუნს გურზუ,
ბაღანობა გუმაშინე ჩქინი,
მუსხი სერ დო ჭუას გივორჯგინი.
მირაგადნა-ჸუდეს ხექუ ხვალე,
მუს დართინე ბორჯი უკახალე,
ჩქიმ სურათეფს გაჯინექუ ირო,
ჩქიმ ლერსეფით ცხოვრენქ გოლვაფირო,
ბაღანობა გუმაშინე ჩქინი.
მუსხი სერ დო ჭუას გივორჯგინი.
ჩათხიებუქ როგუნჯ ქომონჯისუ,
ხვალე თიშო ოსაჭირუდ ისუ,
სი ჩქიმ შარაშ გოთანა რდი ძღაბი,
ტყურათ რენო შური დომიჟღვაბი,
ბაღანობა გუმაშინე ჩქინი,
მუსხი სერ დო ჭუას გივორჯგინი.
მორთი, ცირა, ქომიძირე აკა,
ქოძირ თე გურს მუჭო გილაკვაკვა,
ქოძირ თე გურს მუშ მასქვამა რექუ,
ქოძირ, ქოძირ, მუჭო გიმოჭვენქუ,
ბაღანობა გუმაშინე ჩქინი,
მუსხი სერ დო ჭუას გივორჯგინი!

ქიგიკირუ ცაქ სერ წილამურო,

გოწოს ვარინ-ცირა, წი ვამულო?

ამარ ინგირ ხურხის გითაბ ნირსის,

ა, ბორია იჭყანს გილანირზის.

ეფურნელ რე გური ნაპოპორა,

ქინჭე, ცირა, ჯარბი ვაკოგორა!

ვარა ჯასუ ფურცელ ობარ ძალამს,

ვარა სერი შურსუ გოფარსალანს.

ვარა შქირტუ მურიცხ ეჭაჭილი,

ვარა ნდღულუ სქანი ჩეჯა ჭვილი.

ქიგიკურუ ცაქ სერ წილამურო,

გოწოს ვარინ-ცირა, წი ვამულო?

1.ნაპოპორა-ნატალღარი

 

ნანაია, შხვა ვორდ ირო,
თე გურ ჸოფე სქანი ჭირო,
ჩქიმდა მითინს ვაგაგებუ,
სქან მეტისუ, გოლვაფირო.
სქან სისმარეფ მოფუნს ჸუჩე,
ღორონთ ვორექ გური ქუჩე,
ვაგმაკურცხინ, მარა ქიბგინ,
ნორჩალ მუჭო ელამკუჭე.
ერჩქინაშე ხანგა ვორდი,
სო ვებდი დო სო ვავორდი,
სქვამ ცირეფსუ ქეკვოდინი,
ჩქიმი რინა შქაშა გოფრთი.
უდღანუნა, ნან, ჩქიმჯგურეფს,
მოჯგირეფქუ მიმენდურეს,
მარა ლერსეფქ ამაქექეს
დო ჟი დო ჟი მიდამტყურეს.
ვარე ჰავაშ ფიჩუ-ფაჩუ,
შურქ თიცალო გუმაფაჩუ,
კოჩიშ თოლით უძირაფუ
ოროეფი გიმაქვაჩუ.
ვემგმართინა ანწი გიმე,
ჟინცაშ ქვინჯი ოკო ბზიმე,
კოჩიშ ჸუჯით ურჩქილაფუ
ხონარეფი ელმასიმე.
ქეშილებე დაჩხირქ დირკას,
დაჩხირ მუშო ოკო ნირგას,
მა შილებე გეგნობტორხე,
მარა გურქ დღას ვამოდირკას.
სქან ზისხირქ რე გამაჸალუ,
სქან მასქვამა მი მაპალუ,
ღორონთიში ნოჸელაშე,
თურმე ღორონთს გელამფალუ.

თქვან დუდიშა მუნომლუაფ ჯაშ წვანჯეფი,
ცაშ ნოტეხეფქ ანწი ვარა თე გურს ხირცქას,
თქვათ გიჩქუნა ჸათე შარა ვარდუ ეფი,
თქვათ გიჩქუნა ზისხირ გოპუნდ არძო ბირცხას.

ეჩდოშქვითი ჩილამური გეკვოშქვიდე,
ეჩდობრუო მიხაზირენს, ალბათ, თორსას,
ლერსი, ოკო უკახალე ეკმოსქიდე,
ათე რინაქ მუდგანერო ვეკმამორსას!

კოლხიდაშე წყურგილშორო გემწოფსოფი,
ჩქიმ სისქვამეს მებეჭუდუ მაბჟალია,
ოდაბადეშ თოლიშსინთე გეკობჭოფი
დო ხურხიშა ქიფხუტოლე მაფშალია.

თე გურსუ ღურუშ ორან ჭვეთით ვარზუ,
მარა არძა მურიცხიში ლისმარ გეშქუ,
მუჭო ფიქრენთ – იბთირანქო ანწი გვარსუ,
ჩქიმ შარაქუ ბჟაიოლშე გემწოფეშქუ.

მიკმაჭაბუ ირფელ ართო, ბჯოგუ მერკე,
ებდიდორი, ქიპოპობრე, ეკიბლანდღვი,
შურშა ოკო თისხი დაჩხირ ქენიბგვერგვე,
მუსხის ვაგურზ ჩქიმი ბირგული დო განთხი!

წანეფ,წანფ,ეკოფხართეთ ხაჯალურო,
ეჩდოშქვითი ჩილამური გეკვოშქვიდე,
ჩქიმცალეფი ვეშქურინე ღაჭალურო,
ლერსი ოკო უკახალე ეკმოსქიდე!

ჸათეჯგუა წიმოკინა კოჩის ვაშუ,
ნამს ღურუშფერ ართშა ვარა ვეგნოდვალუ,
არძა ჭუაქ მა ვამავილ მა ვემშაშუ,
გურც ნტყოლირი ლეკურეფქუ ვამათვალუ!

ეჩდოშქვითი ჩილამური გეკვოშქვიდე,
ეჩდობრუო მიხაზირენს, ალბათ, თორსას,
ლერსი,ოკო უკახალე ეკმოსქიდე,
ჸათე რინაქ მუდგანერო ვეკმამორსას!

1.თორსა-საფლობი

ათაბოგის ქიგვოღობა

კირდე-ჩქონიშ მოფერდას,

მითინქ ოჭიშ ქომრთინუდა,

არძა ჯგირო ჸოფედას.

 

ოჭმარესუ ქიგვოჯინექ

წყარიშ წვანე დობერას.

თომაშ სირმას ქიგვოჭაჭანქ

ჩილამურ დო მონგერას.

 

სერიშ ზღვასუ ქიმვარჩქილექ,

ნიარეფიშ მოფენდას,

ჩხომეფს ქიმიბდიარუა,

ორქოს მუთას ოფერდას. 

 

ინორობას ქინვოხვილა

წკონდა ჭვიმაშ მობენას,

ნიშის დომწყუნქ,დღას ვებზალა

ქიანეფიშ მოლებას.

ბარას გარე წკონდა ღალი

მაფელ ონწარე.

ოზეშ თანჯი ბაღანობაშ

მაფუ მოწამე.

 

ხვარჩალია წყარიშ ზესქვიშ

მორჩე ნოხორი,

ქვაჩახია ლეფონეფიშ

რუმე ოხოლი.

 

წყარ-პატონი მიშატყობუ

გორდა ქალამი…

ამარ, გოთეს დუგაგორე

ტყაში წამალი.

 

სია-სია იფაჩალ

დოლო-ისირი,

ქოლოწყუსუ ინავალუ

ბჟალა სილირი.

 

…ნანა მიჭანს,ხიოლი რე,

ორო მუმაში…

წყარი მოჩქუ, ქიგნოდვალუ,

ფერი კუმაში.

მეშარულო მეშაყარანქ

დოსქილადირ წონწემს…

ვარსქილადჷ ყოროფაში

ჯვეშებური მონძე.

 

მუს გოხვარუ საჯიმალოს

გუნანტებუ ონწე,

ათეზჷმა საცოდებას

დუდო ღორონთ ორწყე

 

 

ჭყონი გერე ასე

ვადირიკუნს ჸას…

გოსოფილსუ შქაშე

რინა იშენ წანს.

 

ქარ-ბორია სოლე

ოკონ ლამბუნს, ჭანს…

მარა ზღვაში მოლე

ვორწყექ მენდიშ ჸას.

 

ტანი ოხვარჩალაია

სქანი წყარი წკონდა რე…

პოპორ ოქვაჩალაია,

ჩქინი უმშო ცოდა რე…  

 

ვანა ოშვაშვალაია,

ლაიტეფი – მოტარე.

აქ გიბირუ, მაფშალია,

გვალო ჯვეში, სონდარე.

 

ჯიმაკოჩი მარშანია

მიხვიჩინანს, მოთარე,

აქ ალიო ქობალია,

სამუელიშ მოთა რე.

მა მონირზუ, მი დარღალა,

მუნაველი, მოშარე…

დიადიხაშ მიდაღალა,

ვავა, მუზმა ცოდა რე.

ქაარწყეთო ,,ისტორია,,

მუშ მაპუხა გორდა რე,

მერთომესუ ნისორიათ,

ზარაქ, ცოდა მონკა რე.

შქასუ მურე აშაჸუნსუ ტომბა ზღვას დო მუშ პოპორს,

აკამურიცხიში ცას დო კამარეფიშ სარსიოლს,

სოფელსუ დო მოსოფელსუ, ოლე ჯას დო ტყაფარონს,

სამარგალოშ უღურ შურს დო კუნტა ხანიშ მარგალ კოს?

 

ეში გამაშ გორუასუ ნიშ დობრაქუ სარაქონს,

სერით გვალო გამწობლაფექ, აჸუნაფილ სანარღოს…

ფაშქუნჩიში ორქოსუა ქუგორზამუ სინთეთ ჭყონს:

,,სითი ღურაშ უკულ გენწყუნქ მუორელ ირიათონს”.

 

 

ყარმალუში მერულაფას

კამარეფი იბარბალ.  

მუნარქია, ორო, ლაფას,

ჟინიშ ინი ივარვალ.               

 

უჟამური ჟამიშ მერქა

ვერჩხიშორო იკარკალ,

მერცხულეში ჟირფა ჭირქას

ცაიშარა იკარკანტ.

 

ქიანურიშ თარი შური

უქიანოს გილევალ,

ჩეთ ნწერილი თუთაშურო

უფალუსუ  ალაფალ.

 

მურიცხეფიშ ბეჭილია

ცასუ ცალსაროტო გაბ,

ქაუნი დო ვადგართინე

უკულ დიხა მუთა გაფ. 

 

დიირთითო, თქვა ცოდეფი,

დაჩატებე გურმანგარი,

ჩილამურით დოშოლერე

დიაჩქიმიშ ყვალანდარი.

 

 

ცოდაშ კითხირ გადიდებე-

გოჭყოლადა ღორონთიში,

გურს ნოღვენა, შორს მითირე, 

ქორენია ბოლო თიში.

 

დიირთითო, თქვა ცოდეფი,

გურ ნორღვენა მუ მანგარი…

ჩილამურით დოშოლერე

დიაჩქიმიშ ყვალანდარი.

 

 

ჯვეშ ნაულა ნაშარემს

ძიგირ-ბარდი მორიებუ…

მეურაყუ, აჩქარენს

ჭვიმემს ასე ბორიეფი.

 

მაშარემსუ ელუდეს

ამდღარიშა ნაშარეფი…

ორთა ირთანს, ბრელი რდეს,

ვეპალუნა გაშარეფი.

 

მაშარემსუ ელუდეს

ამდღარიშა ნაშარეფი…

ნანა, მუზმა ბრელი რდეს,

ვეპალუნა გაშარეფი.

 

აკმანთხაფუ გვალეფშქას ბჟა დო თუთა კილაგანს,

აშნაჭოფა ჩიტეფიშ ფსუა ივალ კირდანას,

საარქანო იჭკირჭკინ, პელაგონი მიაგანს,

გასოფუნა გვერშაპეფი ლეჭკანდერიშ კილანას.

 

ბორიეფი მითოხვილ არქანემსუ კიაპამს,

დიასქანშა ქუგუ თოლი ჯაშ ნათოლა კიბალას,

კოჩიშ შურშო ფულირიე ჟინი ორთაშ პიანა

ბედი რენდა, უწორუა ბიკარუა-კილარას.

უჩა ზღვასუ ამუსერი

მურიცხეფი ქინოცენს                

ქიგვაყუნუქ საროტემს,

თუთა მართუშ ნამოსერს.

 

ზღვაში მაფა გონირსელი

უფაჩუანს მუარემს,

მირე ალმოფურცქინანს,

სოფელიში მუორეს?..

 

აქ მუთუნსუ ეკვაჭუქდა,

ვარჩხილჯგუა სქუალემს,

ჩილამურით გომბონუნა

ბრელშა ტახილ ფსუალემს.

ასე ვარა მუნულუანქ,

ორუმეს დო ორომეს,

მუაჩქიმით ქიგლაბარჯგანს,

თუთაშ ქართა-დოხორეს.

 

 

ზღვაშ მორია, თუთაშ მორთა ართო აკოშაყარელი,

ძინულენსუ რუმე წყარი, ოკიდირეს მორინელი,

კიბოია გილეღვარღვუ, ტყასუ მიშახვიარელი,

ნანწყვიშ არფის მიკოკირუქ, თოლეფ გაფუ დონირსელი.

 

ულირ ბორჯემქ ქინოიტუ, ჩხოროფათუ დოხართელი,

მორო ესუთ ვეკაწამა, ვაგურქიე შურო ხენი,

დუდი მედვალირი გაფუ, ზღვაში ლუბას დოკარელი,

შურიშ ვესუ მეჭირხინუნს თოლეკირილ სქანი ცხენი.

 

ქვინსუ მურე გიწონებუ – კოკიშ კოკი, ფერთიშ ფერთი,

ექ ნათუნსუნ, შხვა მუთა რე – მუკნაციმა მურიცხეფი…

ელე ცაშა ქელეჯინი, ქიგიშინი ორგიეფი,

ჯვეში ნიშიშ არფიშ გამა მოჩქუ ნირსიშ ფელუკეფი.

დიაჩქიმიშ ჩე კისერს

დარაია გაფარფალუ,

ოდაბადე ოხვამერს

შარა ვაკო ნაბარბალუ.

 

სანთელ გილაქიმინელს

ოროეფი მიშევალუ,

ღორონთიში ფსუალერი

ნირსო ცაშა მისარსალუ.

ათე ნიში მიში რდას, ზღვაში ეკნაყოთემი,

ბორბოლიაშ ნამოსას მითუტყობუ ნოთენი,

მუჟამიში ფარონემს ნარდიე დო ნოგეფი,

სონი ბორიეფიში უსოფუანდ ნოდეფი?

 

ქოძირუო ნასისმარუ მაფა-ბჟაში ნოხვენი,

უკულ   ბორჯემს ყუნაფილი, უკიანოს ნოზღვენი…

მურე მიკიფიორუნი, ცასუ მიკოქოსელი,

მენიშოლიშ შური რენ დო ერქემიში ნოსეფი?..

 

  

დიასქურიშ ეშნაველს,

ორქო უცენს კირიბემს,                             

თუთა გარე ეშალემს,

ბორჯეფიში კიბირელს.

 

მენჭაფილი ომუნეს,

თუთაშეფიშ ორეკე

უსინთუანს უკუმეფს

ნაწყარუა ურეკეს.

 

აფხარხვილი მეცარე

გირინუანს ოროემს,

სილირ ორქომელანემს

ორგილუანს ორეემს.  

 

მიშესოფუ, მიორე

ურთა-ორთაშ ფულირემს,

მეორიე-მიორელს,

მასქურეფიშ ფიორემს.   

 

ომბა სერიშ დალიერს,

მოგოთანე, კიაპელს,

გეგნირულე თუთაშ თე

ზღვაში წვანე ნიარემს

 

 

 

 

 

ღუმა ოტობურ ცირეფს,

თოლსერ სისმარ მუძირე,

ტანს პეულეფ მიკმოქუნდ,

მუჭო გვალაშ დუცი რე.

 

ღუ ოტობურ ცირეფს,

თოლსერ სისმარ მუძირე,

ორთუმელშა ნოჸელეფ

ტკიბირშორო მუცირე.

 

ღუმა ოტობურ ცირეფს,

ვენტი, ვენტი მუთი რე,

ხვალე ართის ვადურულაფ

ნამუთ ჸათე გურცი რე.

 

ნამუთ ჸათე გურცი რე,

ჸოროფილსუ ქუჯინე,

ღუმა ოტობურ ცირეფს,

თოლსერ სისმარ მუძირე.

ჭიჭიკელა, მერეკელა, ინტელა,

თე რინა რე მინ ღურა დო მინ-თელა,

გერნელ ვორექ ორინაფილ შარას დო,

ნტერიშ ჯინშე არქა ვედიყვინთელა!

ჭიჭიკელა, მერეკელა, ინტელა,

 

ტატიჩხია, ტატურელი, ტატალი,

ყებურს ღუმუს ქუდუჭყაფუ ჭვარტალი,

დიდაშ ხეეფს უჯინენა მარდუეფ,

ბინ შარაშა ბრელ რე გიოჭვართალი,

ტატიჩხია, ტატურელი, ტატალი,

 

ოფოფორე, ფოფორია, ფაფარუ,

კინოხონიშ ნერჩი მოთაქ გაფარუ,

სოთინ მუთუნ ვეძირებე ოხორსუ,

აბრაგიშ დო გერიშ გიონთხაფარუ,

ოფოფორე, ფოფორია, ფაფარუ,

 

კიკორია, კიკოდემი, კოკორო.

ქიდოიტესო მაღაზეფი ხოკორო?

გინორთექო თუნთიშ დირთხიშ

მანგურო?

გინორთექო ტოჯეფრო დო  ნოყორო?

კიკორია, კიკოდემი, კოკორო,

 

შიბა რენი, იშიმბორი, იშიმბე,

ჯგირ დო სქვამითჩილი გიგმოხიშიმბე,

მუჟამს იინ ქეკახატა კვიჭინხეს,

მუჟამს იინ ეგებ ძალამს დიდშიმბე,

შიბა რენი, იშიბორი, იშიმბე. 

 

ჰავას ნახვილეფ ვამკასოფ თოკშე,

კიროკილ თუმას წყარ გეწენს დოქშე,

ეფურნელ ჩეჯას ვარკუ მეჯინა,

მარა უსქვამაშ ბონილ რე ჯიმა. 

 

ჭუმე ქუდოცენს ორქოშფერ თუმა,

ჭუმე იჸუაფ ნატრიშ ერთუმა-

დობადონაშო გვალო დო ფალო!

ჩეჯაშ უსქვამაშ ბონილ რე ჯიმა. 

 

დორზამილ ბუხარც აფუ ართ ამბე,

ალდაჩხირ ცხვინშა გეშაჭვართაფე,

ეფურნელ ჩეჯას ვარკუ მეჯინა,

მარა უსქვამაშ ბონილ რე ჯიმა.

 

მუს ოცილუ ჭყონი მეხი  ჸალას,
ჭყონი ჟინცას ქიმკიქუნანს მალას,
ჭყონქი ოკო ჭყონიცალო ფალას,
თაშ ვარენო ,ჩეცხენამი ჯეგე?!

მაფშალია მუს ოცილუ  ქირეფს,
მაფშალია გილმაქარგუნს ბირეფს,
ორულუანს ატამეფიშ ცირეფს,
თაშ ვარენო,ჩეცხენამი ჯეგე?!

საქორთუო მუს ოცილუ თურქის,
ვარა რუსის უნწალუნსო ფურკის,
გოღურჯოლსუ ხარხუნტია ხურხის,
იფსხუნუათ სქან ბორზალი, ჯეგე! 

იხი, ხარენც ლაკაციაშ
     
ციორითუ,
აკა მუშენ ვემირულექ

     
ფიორითუ?!
გეგმათხოზუ თოლი ფერდის

     
წაწაფითუ,
ვემირულექ მუშენ კოკაშ

     
 კვანწაფითუ?!
სო ვარენო დამორჩილიშ

     
ფოფორ ჩანსუ,
სონ ხანი რე იხი ნოხო                                     
 
      იფორჩანსუ
.
სონ ხანი რე დამორჩილი
,
შურსუ ჭვეთანს
,
სონ ხანი რე წყუ ყვინთელო
,
ბონუნს ჩე ტანს
.
ლილაშფერი ოროეფი

     
გვალენს ლოლუნს,
აკაბრცხათ დო ბჟა ოჭმარეს
      
გეიშათოლუნს,
დრო რე, ცირა, სქან ორკოლშე

     
წყარსუ ფშუნდე,
დრო რე ხურხის მასქურცალო

     
ეთმარშუდე!
იხიქ-ეიფშ ლაკაციაშ ციორითუ,

ვემირულექ მუშენ კაბაშ ფიორითუ?

 

 

ჟაქ გინილ გვალაშ ხინჯი,

სერ ილიებუ ჸინჩას,

იჭირჭკინ ლურიშ ქვინჯი,

ჭვიანს ნოჸელშე კვინჩა.

 

ალბათ ჸოროფა ორკუ,

დო ანგარინე კინი

ანწალა ჯას მებორკუ,

სერ ილიებუ ჸინი.

 

 

   

მეურს ურემი, დამორჩილი რე,
სერი გინძე დო დღა- მორჩილი რე,
ჯათ გორჩვილი რე თავრენჸურენი,
ოდაბადეში მოკო ბღურენი.

მეურც ურემი დო მირსიოლუ,
ჸოროფაქ დუდი მომირსიოლუ,
ტან მარზიოლუნ აკა, მუ რენი?!-
ოდაბადეში მოკო ბღურენი.

ემერ სქუა და ემერ ჩილი რე,
შური ფურცელით მოფორჩილი რე,
ფოფორ ჭვილი რე, ვეფანდურენი?!-
ოდაბადეში მოკო ბღუ
რენი.

ოხვამურ ჯა რდი, მარა
დეჩიჩიო, გვიმარა?
ვეგლენგარა ირიათო
თი თუთა დო თი მარა,
ოხვამურ ჯა რდი, მარა
დეჩიჩიო, გვიმარა?!

ჩელაია ნირსი ცაშე მირაჸვალუ,
გოკურცხია, დიდა ინგირ გირაქვალუ,
გოლუაფირო, გოლუაფირო, ირო ფალუ,
კუჩხეფიშა წყურგილეფი ქუმოიდვალუ,
ოხვამურ ჯა რდი, მარა
დეჩიჩიო, გვიმარა?!

შხურიშ ტყების გეჭარუდუ სქან ნინაშა,
მუჭო ოკო ონდღულესკო ფულანდი!
ითამ კუჩხი გეიდგუმუდკო ტინტილაშა,
ეკორჩვილი გილეში დო ქულანდი!

შხურიშ ტყების გეჭარუდუ სქანობურო,
ორქო ქვიშაშ კორობუაშ წესეფი,
გიკურცხინე, გიკურცხინე, გოლუაფირო,
სი მუნაფას გიწილოხუნს მესეფი!
ოხვამურ ჯა რდი, მარა
დეჩიჩიო, გვიმარა?!

ბირგულ მუშენ გიდირკუ,
კოლხურ ბირაშ მარჩქილეს,
ქარწყექჰავაქ ქიდირქუ,
ფსუა გეკოვარჩხილე!
ქიგიშინი ხიოლი,
რე მუმულიშ ჸიონი,
მობაღუნა ქიონი,
უზისხირე გვიმარა!

ნჭყოლირ გური მუჭო ვემკისქილადე,
ღურა თელათ მუჭო ვემკიზგილატე,
კოლხიდაშე ლანდი ქუდოსქილადე,
უზისხირე, გვიმარა!

ჩელაია ნირსი ცაშე მირაჸვალუ,
გოკურცხია, დიდა ინგირ გირაქვალუ,
გოლუაფირო, გოლუაფირო, ირო ფალუ,
კუჩხეფიშა წყურგილეფი ქუმოიდვალუ.

ოხვამურ ჯა რდი, მარა
დეჩიჩიო, გვიმარა?
გიკურცხინე, გოლუაფირო,
ვარა გიმორჯგინანა!

გემწოდირთი, გემწოჟვენგი,

გემწოსოფი გვიმარა!

ოქუმი დო ჩქიმი რეფი,
ჩქიმ ფიჩორიშ მინდორეფი,
ჭველეფ ,მით ტყას მითორეთი,
ათე გურიშ ჭუა რეთი.
ჩქიმ ინგირ დო ჩქიმი ხურჩა,
ქელამჭიშეთ მუთ რე ხუჯშა,
ჰავა,ფურცელს სო მეხუშა,
ეშმანტირეთ არძა ხუშა.
ჩქიმ წისქვილ დო ჩქიმი კარე,
ჩქიმ ვარჩხილიშ ოჭუმარე,
დებჯერაო ,გოლუაფირო,
შხვაში რენ დო ჩქიმი ვარე?!

ჩქიმ ქიანაშ  მაფშალია,
შხვა ქიანაშა ვაფურინა,
გოლუაფირო,უსქანეთუ
გეწკურილი მაფუ რინა.
სქან ოგვაჯეშ ხეშქაგური,
ჩილამურით მაფუ ეფშა,
სქანი ართი ბირაშენი
თე შურს ხოლო ღურუს მეფჩა.
საქორთუოშ ცე ქიცა რე
თე გოთანა ხვარჩალია,
შხვაშ ქიანაშა ვაფურინა,
ჩქიმ ქიანაშ მაფშალია.
გონწყი ფსუა დო კისერი,
თუთაშფერი ქუმოძირი,
არძა ჩქიმდა,არძა ჩქიმდა,
სქან ჭუა დო სქანი ჭირი.
უღურჭულე წკონდა ღალეფს,
წვირალ თხუმ დო მაბჟალიას,
შხვაშ ქიანაშა ვაფურინა,
ჩქიმ ქიანაშ მაფშალია.

ჯოღორ ლალჷნდ, ფურკ ეურდ
მიკიკაკჷდ ჯალეფს კჷდჷ
დო ემხვარიშ ნოხორისჷ
ბორია გილეპოტიკჷდჷ.

ბჟა ეურდ დო ილუურდჷ
ობზაკალეს ზესქვ კუთანდჷ,
ამდღა თაშირდ, ჭუმან თეშ,
დღა გინძე რდჷნ, სერ კუნტა რდჷ.

ნუზუშ მანგო, ოქუმ-წყარც,
ბოგათ ჭყონიშ ჯა გოძჷდ,
გალე თჷნდჷნ, ჩქინ ბუხარსჷ
დაჩხირ მითობორბონჯჷდჷ.

აფუნც პეულს გატვიტვანდჷ,
სიორს ჸუმურს მუს უხარდ
დო დამორჩილს მარდუალ
დიხაშ ლებიშ შურ უნთხანდჷ.

ჯოღორ ლალჷნდ,ფურკ ეურდ,
ჟამს ბრელ მუთუნ ულამუდ,
დო ემხვარიშ ნოხორისჷ,
ბორია გილეპოტიკჷდჷ.

 

შამანეფიშ ქანაშ იშო

თირქ მიდეღას ქიჸი ქანა,

ოდინაფშე კუჭ-ხუმაფილ

გერეფ დიდას იგორანა.

 

ბორია ჸურანც ტურაცალო,

სერი რენ დო თუთა ვარე,

ამდღა ვარდა ჭუმან იშენ

ღორონც შურსჷ მივაბარე.

 

ჩე მუნაფა ქაქთომირჩით,

ჩე მუნაფა ქინმოქუნით,

ღურუქ ჭახანს ქიცალუ დო,

აფხაზეთშა მიდომჸუნით!

 

დიდა თექ პუნც, მუმა თექ პუნც,

თექ პუნც მამჷდა მარდუალი,

ნუზუშ ჯინჯის ჯვეშეფიში

საფლე-გურიშ მაჭუალი.

 

გალე თჷნს დო მის არჩქილე

გურჭყოლირიშ გურიშ ჭუა,

რინც დო სისმარც მიშეფაფუქ,

გოშინას შურს უჸუნუა.

 

ოქუმს ასე დამორჩილ რე,

ორქოშ ფუთქი მიკოძ ლაფას,

აჰ, შურ ქომწი, მუჭო გურზათ

თესხე გურიშ მჷკოლაფას?!

 

ღუმურიშის ჸურძენს წილნა,

მანჭარიშ შურ ინთხანს სოფელს,

ფრანგულა დო იზაბელაქ,

ლაგვანიშ დუდ გეგშასოფეს.

 

ოქუმ-წყარპიც წყარიშ დიდა

წყარიშ სარკეს ინაჯინე,

ტყას ოჩოკოც გილაჩაკანც,

სალამ ოკო ქჷმეუჩინე.

 

მელენ ბორია მოლენ ბორიას

ნუზუშ ჯინჯშა იჭანუანს,

თუთარჩელას მაფშალია

ბირა-ბირათ ოთანუანს.

 

შქასერს რეყეს წყარ გეჩენდუ,

მიკოთასუნს ტყაბიშ ფუთქურც,

ჭიჭიკეფიშ ღვათა იჭყაფ,

ქათალანძეშ ღალიშ გართუს.  

 

გოთანდუნ დო ტორონჯ ცაშ კარს,

ცაშფერ კჷდჷრს ქიმკახატანს,

მოგოთანეს თოლჯღარ ჭურჭულ

ანარაშ დუც გაჩენდ  ჭახანც.  

 

ოდინაფუ, ქანაშ ბოლოს,

ჸინქ მიდეღას ქიჸი ქანა,

კუჭ-ხუმაფილ გერეფ ტყაშე

მერეთმოსლას ირცქინანა. 

 

ბორია  ჸურანც გურიშ-საჭო,

დისერუ დო თუთა-ვარე,

ამდღა ვარდა, ჭუმან იშენ,

ღორონც შურსჷ მივაბარე.

 

 

 

ცას ათაბიჯუ გვალაშ წვანდეფი,

ანარაშ დუსჷ  ობრი წიანსჷ,

ბუნეფს ხავერდი მინოქუნსჷ დო

წყარეფ ეუფშაფ წვერენტიასჷ.     

                     

ოჭაკეშ ტყასჷ ერემ ღვარანსჷ,

მუშენ წუხენს?-ხვალე რენო?

ერამხუტიშ ურაშ ხუმა

ბორიას მოუღ უშბაშენო.

 

ჩხანასჷ დიხა დუმონკათებ,

ბოშის ველუთჷ, ბახუტიას,

მა მორდიობა მოკუთნ ჯიმა,

ბჟას მარებელ ვაფუდია.

 

ოქუმ-წყარ ჩქიმ კჷდჷრს მეფუნსჷ,

თესჷ გარზება ვაკოდუო?

გლახა მუთუნ ქუმორძუნდა,

სქან გოლუა საქორთუო!

გური მუზმა წყანწყილ მაფუ,
ჭვიმა რე დო გოლოფა…
მიდგა–მოდგა გილერქაფუ,
ვამაცალეს ყოროფა.
წყარპის ფეშერ დომირჩაფუ,
ბაწარ გობძუ ჩხოროფა,
გური ბრელიშა ჩართილ მაფუ,
შური ოკნაკორობა.
ჩას მუნაფა მუშე გაბუ,
ეშმაკეფიშ ჭყოლოფა
ბრელსუ ირფელ ართი აფუ,
ჭოროფა დო გოლოფა.

…ამარ შქედი ,საორიო,
ჩიტეფიში ეფშა…
ჩქიმ აბლაკი მეჭირხინუნს
თე სოფელიშ გეშა.
მეურქუ დო გურსუ მიღუ,
ქომიშითო ხეშა…
მარა იშენ,საწყალცალო,
ართის ვემუოქეშა.
გერს კირიბი ნოხირით
დოგვანუნო ჩხეშა,
ირიათო ჸურუას,
ვამოშქურუ თეშა.

მიოხვამუ დეადიას
ათუჩოქუ დეიდია,
შუმნაშუა დარაიას
აწუწილუ იაია.
დუდოხატის მუცირუანს
ფეროსუ დო ფერაიას,
შურუბადუ ქიმთოშქურდუ
ისიროტაისირიას.
პეულეფიშ მინდორიას
გილევალუ მარწკინია,
ხუს გილაბხე სინთორია
დადა ცირამაცირია.
ოზეს გინი გილერულე
ქაუჩა დო სქვამაშია,
კიდას ყამა მიკორწკინუნს
ვარჩხილერი შანაშია.
სი ქომიწი,ჭვიმაშია,
რინა რენ დო სისმარია.
კურკანტელა ჭითაშია
გარზუ დეიშ სამარიას

ერია რე,მორია რე,
თუთაშფერი ბორია რე,
ზღვა ორიუ ოდიარეს,
ფორილიე ფურიალე.
მაფაშ ხორი–ხორიალე,
ხორგონი დო ხალია რე,
ორქოყილო ხვიარელსუ
ხაიაში ხოლუა რე.
გინოლასუ მიორენი,
მადინაფუ მედია რე,
მონიარე მიარენი–
უთურეფი მეფიარე.
ერია რე,მორია რე,
გილეფაფუ მორიალე,
ზღვასუ კოკო გელაფირი
აფსირტე დო აია რე.

ადა მარია,დადა მარია,
სი დომთხილე დო სი დებარია
ჩქიმი მოთა დო ბადიში ნარდია–
თაშ იხვამანდუ ანა საჯიხე.
ადა მარია,დადა მარია,
სი გემწონია ცოდა- მარდია
თაშ იხვამანდუ საჯიხე მახვამერი.
ადა მარია,დადა მარია,
კიდირს გიფინუნია ია დო ვარდია
სი ქოიჩქუნია ნანაიაშ დარდია–
თაშ იხვამანდუ საჯაია დადი.
სანთელს გორენია ჩილამურია,
უღუშა გემირთუნია ხაჯალურია,
სქანდა მუკომჭოფუნია ღურელ გურია–
თაშ იხვამანდუ საჯიხე განგარებული.
ადა მარია,დადა მარია,
დაჩხირო გუმორზუნია ზისხირელ ოსარია,
ჩქიმ სქუაშ ნოშირიენ დო სქანიში ,ვარია,
ჟირხოლოშიავო,დიდაქირსე!–დადიქ.

ცაშ ნოტეხი გამკოლაფე
უხვამერიშ ნაჭარა,
აკოსერილც უსერეთუ
ვემიოჩქუ ნავალა.
მუხურონსუ გილესოფუ
ჭითა ხოჯი ნაზალა,
ჭყეში ოროს ქოთხოზაფუ,
მისარონი ზარზალანს.

დადი,სინთე ქუმოძირი,
ვენმოქოსა გარამემს,
აფხაშ რხვილქუ ქიგმაწკურუ,
გილვოგაგა წკვარამემს.

კურუმემსუ ვემიოხე
მენცარეფიშ ნაჭარეფი,
ყურუმულო გეგნოსქველე
მითაჟამიშ ნაჭარეფი.

ქარბორიას ქოთხოზაფუ
ნაშილუა ნოსეფეფი,
იშო დიხას ქიმთოფულე
ოხვამე დო ნოგეფეფი.

არძა ართო გამკოცუმე
ჭკარჭკუტია მურიცხეფი,
მებდინაფუ თუთაშ გურ დო
მუშ ჩელა ოროეფი.

სო ვორექ დო სოლე იბდა,
დინაფასუ მივორექ,
ვესინთორუ უსქანეთუ
სოფელიში მუორექ.

 

უსიორო სისანდობას                                              

შურიშდგჷმა გოსამარე,  

ტყას მიდუღალ ჩქიმ ნოხორიშ,

ჯვეშ ჯარგვალიშ ოლაფარე.

 

სო რე ჩქიმი ოდა-ჸუდე,                                                      

წყარპიც იკოდგუდუნი,

დოხუმაფე ქვიჩალ  ჸუმურ,

მარტის პეულც თუნდუნი.

 

ტერს დუჸვილ ჩქიმ ძიძესქუა,  -

ერამხუტიშ მანგი რდუნი,

მუ ოხვარ ანწ დიამუშის,

თოლც ჩილამურ ვაკორდუნი.

 

ნირს გითოჸუნს გვალაშ ჯინსჷ

ცათ იმზადებ მანგარალო,

ქჷრ რეყეშ დუც ორგიას ორთ,

ალბათ, თეშ-დღაშ ოღალარო.

 

სოფელ უჩათ გონწერენ დო

ჯიჭონ ინგარც ღალიშ პიჯის,

გოლუაფირო, ჩე დღაშ იმენდ,

რენდა,ხოლო მუთა მიჭირც.

 

ცჷზანს, ცჷზანს ზენიშ დოლოს,

ჩქიმ გურც ხოლო ჸოროფა რე,

ტყას მიდუღალ ჩქიმ ნოხორი,

ჩქიმ ჯარგვალიშ ოლაფარე.

 

შურს სიტიბაშ ზღვათ ემფშანდუნ,

ოქუმ წყარშე გინოჯინა,

თოლს ჩილამურ ილაპუნდუნ,

ღორონთ, მუ რდუ, მუ რდუ თინა?!

აფუნ ფსუას გოფაჩუნდუნ,

ვეთებუდუნ მიჩქუდ რინა,

ფურინ მოკოდ ტორონჯცალო,

მუ რდუ, ღორონთ მუ რდუ თინა?!

თოლ-ჯღარ ცირა გილეშ ქართის,

ჩქიმ წვალება ვაგმოშინა!

ქობძირუნდინ, ცა  მანწყუმუდ,

ღორონთ, მუ რდუ, მუ რდუ თინა?!

ვეველუდინ, თეშ ქუმურთუმ,

ბედის დუგორ ჩქიმი ბინა,

კარ დურაზინ ვაგუუნჯინ,

მუ რდუ, ღორონთ, მუ რდუ თინა ?!

თეზმა ამბე ისოფ გურსუნ,

კოჩ ქორექდა, ვამედინა!

სი გიჩქ, ღორონთ, სი გიჩქ ხვალე,

მა გურს მუჭო მაჭუნ თინა!     

ლერს იმენდო ალამირე,

შური გამისქვამუა,                                                 

ჩქიმ დუც ბრელ რე გინნაულა,      

 გურგინი დო ვალუა,

ცას მურიცხიშ მოხარცქუა,

თუდო დიხაშ ნწალუა,

მარა იშენ შური მიდგჷ,

დუღას ვუგვარგვალუა,

ჩქიმი ნარგი რინაშ ნერგის

პეულქ გამკოფალუა.

მოთალეფ რე ჩქიმ წამალი,

ღორონთქ დომიხვამუა,

ჩქიმი გური, ჭყოლირ გური,

თინემქ გამიხარუა.

ბჭარუნქ, ფსოფუნქ, იფსოფუქ,

ვამოზარჷ ჭარუა,-

ურაგადუშ რაგადი დო

უხარ თირიშ ხარუა.

 

თე ცხოვრება ზღვა ორდუნი,

მიჩქუდუო ბაბა,

გორჩქინელი კოჩი ჸოფე,

ზღვასუ დინნადღვაბა. 

წყარც გეცუმილ ხანდა რე დო

კოჩით ხოლო-ხანგა,

ნამს ჩურუა ვახუჯუ დო

ოქრო-ვარჩხილს განგარს. 

უჩაყარი ძალენსუ დო

ჰაი ჩქიმ ცოდა ნანა...

ურძღაფელა ჩხომეფს პიჯი

მუჭო უქიქანა. 

დონი ართო წკურუმი რე,

ნოშკვერ ქილია რე,

ორგიაში უმუშოთი,

მუთუნ რსხება ვარე... 

შორშე მოჩქუ წყარიშ პიჯი,

ჩეჯალეფიშ რქია,

გოლენს ჟი გენმიგორგოლუ

გოფშა თუთარჩია

 

ეკისერუ უსერეთ,

ცა გიორე ონგარ დღას...

ქარ იგანს დო ფურცელენს,

ევრე-ავრე ოფართხანს.

 

გოვალ, გოტყვაც თოლონჭეს,

ცაქ გიხირიტ ობჟალეს,

შქურინაფილ ტორონჯეფქ

გოლა გეგნიტკარჩალეს.

 

სო იდი დო სო ფურინი,

სო იდი დო სო ფურინი,

ქარწყექ მუჭო დოვღურინი,

ნეტე ღურელ ქოპუნინი...

 

გურქ ოკომცუ ქუმუცალო,

თოლეფქ ეკმაფშ ვალუას,

მუ გურზუ დო მუ მუცალუ

ჩხანაშ გითოფალუას

 

გოლეფს ნირსი მობუდუ დო

ეკიეკ მიკიბაწარუდუ,

გიმანთილსუ ნოქურს თუდო

წყარიშ რაჩხალ აზარუდუ.

გვართა ცასუ მუკნასოფა

მოქირინელ არგუნც გუდუ…

წყარიშ გვარგვალ როფა-როფა

ქუეფც გითმიპუროსქუდუ.

ამდღა გვალო

შხვანერ დღა რე, გვალო…

ჭვენს დო თჷნს დო

ქარ ირქენსუ ძალო,

ეი, ვარა!

დუც დიპილუნდ მარა

ხვათა-ხვალე

ვადმატენექ გვალო.

თოლი სქანი -

მანჭიე დო მანჭი,

წკურუმირე-

ჯინჯშა ვედინვანჭი.

ჸოროფასუ

ვაკო ეზმა გაჩი,

ა, კილა დო

გური ვიშო განჯი.

სი ვარექუნ ხასილასუ,

მა ირფელი მაცილანსუ,

გურშა ქეიფხუტოლუა,

სქანიჯგუა სქვამ ცირასუ.

 

თუთა ორდი თუთარჩია,

ჩე ნაბადო ქოდმარჩია...

შურ დომიტე წკირილო დო,

გურც დაჩხერი ბარბანჩია.

 

რაგადანდინ, ქორშუნია,

პეულეფი თორსუნია...

ნეტე მუთუნ ბრალს ვორდენი,

ღვანწკეფს დაჩხერ გორზუნია.

 

ჭიჭე ცირა, ცვირალია,

უჩა თოლეფ გვირალია,

ჩქიმი გური სი დოჸვილი,

ანწ ვარე მაპირალია

 

გვალა-გიდალ ქვარამი,

კირდე-რობუ-წკვარამი,

ერცქემიში ქაწვანჯა,

ცას მეგ, ყამატარამი.

 

ქირი-სუაშარშალა…

ბჟა ველუნსუ ბარჩხალა,

ვართი-შხური, ვართი-ჭყიში…

ვართ-ხვამა დო ვართ-ჭყალა.

დობშურდი-გიჯინექ ჭვიტეშე,

მოკო სქანჲ წორო გილეფშე…

ცაშე გეგმოზღვინდა თოლეფც-

მოკო საცოდება ბღოლე…

დღალეფც აშვოკირა ონწეს,

მასქურც გითვოტყობა მონწეს,

ყებურს ვუფურუა შურც,

ღორონც კონ უთხილა შხურც…

მოლა, მუნაფაშა მოლა,

თაქ რინჲ გინორთუმე ჭკოლა,

ღურუ საფულეშჲ კარც ჯგორუ,

მოლა, თუთაშ ომპას ბგორუ…

დობშურდჲ,

იფცქვირინა ჭვიტეშე…

ბორჯრე ცაშჲ ოხვამეს გოლეფშე

ჩხანა,ჩხანა ბარჩხალია ჩხანა,

სქანჷ ოროშე ელნაფალა თუთას,

ქეყოროფუ ჩქიმ სერქჷ  დო ვათხუ,

ცაშჲ სქუალეფც-ჯეგეთას და ურთას…

 

ვადმათხინუ, სისმარებით ბჭყოლუნც,

მუშო მოკოდ თეშჲ  კიკინჲ დო ჯინა,

ნანა მუჭო ვამარტინუ თეშე,

მუჭო გამმწარ ჸოროფა დო რინა…

 

ჩხანა. ჩხანა, ჩხორთოლია ჩხანა,

ქუწი მუთუნ უონჯღორე თუთას,

მუ იჸი ღორონთქ თე ქიანაშჲ სქჷბუს,

თეშჲ უმოშო უჯინას დო ურთას?!

 

ჩხანა, ჩხანა თოლუნჭაფუ ჩხანა,

ვადომტუა თუთაწკჷმა ხვალე…

ჩქიმ ჯინჯიშა მეჸონილემქ

ქუდომჭყესჷ ჩალუა,

მარა მუსუ დუმარკენც,

გერც ცუცქეფიშ ლალუა…

მუჟამსირდჷ უჯინჯეთ-

ჯაშ ნოჸელა ფალუნდუნჲ,

ვარა ყამა ჩუალირო

ვარკალანდ დო ვალუნდუნჲ…

სამარგალო- გურიშ კილა,

ღორონთიში კართეშ ორო,

ღურჭულანა მარგალეფი,

ჯიმალეფიწკუმა-წორო. 

 

ჩქიმი სქვამი სამარგალო,

ოხვამურ ჯაშ ელნარდირე,

გაფურინანც მაფშალია-

ოშ ხონარშა ელმაბირე. 

 

ვოი ნანა გოლუაფირო,

სქანი მანგი მითინ ვარე;

მა ვორექჷ, ჭიჭე ჭყიში,

მასქურწკუმა მიდგუ კარე. 

 

სქან სანთელო სქან გოლუა,

სამარგალო, ჩქიმი რინა,

მა ვამაკო, მა ვამოკო,

უსქანეთჷ  წუმოძინა. 

 

სამარგალო-გურიშ კილა,

ღორონთიში კართეშ ორო,

ღურჭულანა მარგალეფი,

ჯუმალეფიწკუმა-წორო.

სამარგალო-ჯინჯი ხატი ჩქიმი,

თოლც ვა მოთხუ დღაშ დო სერით მა,

თაქ რე ჩქიმი გიორგი დო ცოტნე,

სქან სანთელო სქანი გოლუა.

 

მოსიზმარუ, გეთუ ქიანაშ ხანქჷ,

ვამმოსვანჯუ გურიშ ჭუაქ მა,

მაფშალიეფ ღურჭულანა ცასჷ,

სქან სანთელო, სქანი გოლუა.

 

სამარგალო,ოდაბადე ჩქიმი,

თოლიშ სინთე, ბორჯი გოთანა,

ერძამილი მურიცხეფ დო თუთა,

სქან სანთელო, სქანი გოლუა.

 

კონსტანტინეშ ნაკილოთა ბაღის,

დობრგათ ხოლო საარკვანო ჯა,

სამარგალო-ჯინჯიხატი ჩქიმი,

სქან სანთელო, სქანი გოლუა

 

კინ ქორძირი ჩქიმი ხეთა,

ჩქიმი ჯიხა, ჩქიმი ლარჩვა,

ურთაშ გოლა დო ჯეგეთა,

ჩქიმ ყებური, ჩქიმი ლარჭა;

 

მა მორდილქჷ ვეგერგიდა,

მარდუალი ირო ფშუქი,

სი რექ  ჩქიმი ჯგირი დიდა,

სი რექ ჩქიმი თოლიშ შუქი.

 

მუდგა ვორდე, სოდგა ვორდე,

ანთას კლასიშ ნაგურეფი,

დღას ვაგმოჭყორდ სქან ჩე ქუა,

მუაჩქიმიშ ნაქურეფი.

 

სქან ძიგირი, სქან მუჸია,

სქანი ბჟაში გილნაწირა,

სქან შარეფი მუკი-მუკი,

დო ფარცვანხეშ სქვამი ცირა.

 

მა ფშუ ათე ობირეში,

კობახია ასლანგერი,

თინა თექი ოხორანსი,

სოდეთ ორე ნალანქერი..

 

თიშ კარეშა ვემიოთინანც,

ვართ ტურა დო ვართი გერი,

ყაბარდულო მონწყილი რე,

თიშ ცხენი დო ონანგერი.

 

მა ფშუ ათე ობირეში,

სქან გურეფიშ გილნაბირა,

თიშ უკული, ჩქიმი ხეთა,

ბრელშა ორექ გილნაპირა.

 

ირო გიბირქ, ვაბღურიდა,

კობახია კალიშ სქუა,

დიდაშ კართეთ ქიგნმოფორი,

სქან დიხა დო სქანი ქუა.

 

ათაშ ვორდათ, ჯგირო ვორდათ,

ვადმოსქიდა გურიჭვილო,

ჩქიმი ხეთა, ჯგირი ხეთა,

ირო ფალი გოლიუაფირო!

ჸა ოჭმარეს ზესქვ გილარხე,

ჸა ონჯუას -მალაღური…

სქან ოსქვებურ ვამათქუნი,

კოჩ თაშ მუჭო ალაბღური?!

ვართ მასქურო ეშმოლ შურქუ,-

ქიგნოირქიე თუმასჸნი:

სქან უჯგუშო მის უჩქ, ცაშა

მუ მეუღუ კუმასჸნი…

ნარღიშ  ჸასჷ გილაჸონუნქ

პირსელიში მუმულჯგუა,

გინაიჸია სამარგალოს-

ჯგირობუას უკუჩხუა.

ირიკოჩიში მენძელი რექ,

გოონჯღორუ სუმარუა;

ჭყოლირ გურიშ ლეცერი რექ,

ღურუს ცურუს უვარუა.

ანწ ვარენო ქომკითხენ დო,

ქიგლულ, ქიგლებლანთირუქჷ…

ოშ ქიანა მიბლი, მარა

ნამთინიშა ვამთირუქჷ…

ნდოლო ცუნდელ,
გვალა თილ,
ცა ნაჭვემა,
ნირს ფაჩილ,
შარა ულათ
შულადირ,
დაჩხირ ყებურს
დორძამილ,
ყანწი ღვინით
შუმაფილ,
გურ ჸოროფათ
წყუნაფილ,
ტყვია თოფის
მორხინილ,
ჭყორ ნაფურნა
ვაჭოფილ,
ცურუ ჯას ჟი
ჭირნაფილ,
ბუძგურიეფ ჯას
ცუმილ,
ხინჯი ბოგას
გოდგუმილ,
ოშ ნაულა,
ოშშა ნწყვილ,
აკნარღვეფი
აკონწყილ,
ოფულარი
ვაფულირ,
სიტყვაშ რთაფა
კვარკვანტი,
იშო-აშო
კვარკვანწი,
ნახარებუ
ხიოლი,
გოთანაში
ციორი,
მუმულეფიშ
ყიონი,
დადულეფიშ
ფიორი,
ოშშა ჰამო
რაგადი,
ოშშა ჭვახეთ
კვარწახი,
ავრე ათორჩქინაფა,
ევრე ღირთაფ-რცქინაფა,
დღა-სერიში ჭუებულ
ვაიწუე, მუს გიფულ,
ტყურათ გოპუნქ
გუმართუქ,
მა ვავორექ
დუმართუ.
შარა ბოგას აკორე
ნირს გოთანას აწაფაფ
მუთუნ კოჩის ვაჭოფე
ჭყორ ფურინელ აკაშა.

Calendar

April 2014
M T W T F S S
« Oct    
 123456
78910111213
14151617181920
21222324252627
282930